Serokê PSKê Bayram Bozyel, Serokê PWKê Mustafa Özçelik, endam û rêvebirên HAKPAR, PDK BAKUR, PSK Û PWKê beşdarê şahîya Newrozê bûn, xelk û endamê partîyan ketin dîlanê.

Qenalên Kurdî şahîya newrozê şopandin û bi zindî weşandin.

Di Şahîya Newrozê da jibo şehîdên Kurdistanê rêz hat girtin û li ser navê her çar partîyan Serokê Şaxa PSKê a Amedê Hidayet Fidan peyama hevbeş a Newrozê xwend.

Peyama PDK BAKUR, PWK, HAKPAR Û PSKê wisa bû.

SEMBOLA AZADÎ Û SERXWEBÛNÊ NEWROZ PÎROZ BE

Îro Newroz e.

Newroz sembola azadî û serxwebûnê ye.

Newroz ruhê serhildana Kawa ya li dijî Dehaqê zalim e.

Newroz bîra têkoşîna me ya azadiyê ya 3000 salî ye.

Em îsal jî bi coşeke mezin, bi baweriya kûr a azadiyê û bi hêviyeke xurt a serkeftinê Newrozê pîroz dikin.

Em zincîrên koletiyê yên li stuyê gelê me xistine bi biryardarî dişkînin û gav bi gav, bi cesaret û sebrê rêya serkeftinê vedikin.

Em piştî her têkçûnê ji nû ve vedijîn û sirûda serkeftinê nifşek dihîhînin nifşekê din.

Em li Amed, Mehabad, Hewler û Qamîşlo ji bo azadiya Kurdistanê di ruhekê da dibin yek.

Ji bo paşeroja gelê Kurd û Kurdistanê em di demên dîrokî re derbas dibin.

Ne pir zu, çend sal berê miletê kurd li başûrê Kurdistanê bi berdêlên mezin statûyek azad û federe bi dest xist. Wê rojê bextê me guherî.

Niha gelê me yê başûrê rojavayê Kurdistanê li ber firsendên dîrokî ye.

Îro dilê Kurdên çar aliyê cîhanê, li her şeş parzemînên cîhanê, ji bo Rojavayê Kurdistanê lêdixe.

Ew rojên ku gelê me yê Rojava li welatê xwe da azad û bi serbilindî bijî ne dûr e.

Ti asteng tune ku em bi saya dîroka xwe ya dewlemend û tecrubeyên xwe yên kur pê ra serîdernekevin.

Gumana me tune ku em ê li Rojava bi yekîtî, hevkarî û tifaqa neteweyî bi ser bikevin.

Ji bo parastina statuya federasyonê ya ku me bi dest xistiye, em ê Başûrê Kurdistanê wek ronahiya çavê xwe biparêzin. Ji ber ku ew xewn û hêviya me hemûyan e.

Em ê ala ku Qadî Muhammed hilgirtiye hîn bilindtir bikin da ku kelehên zordarîya kolonyalîst li Kurdistanê hilweşînin.

Ji bo ku çek û pevçûn li Bakurê Kurdistanê bi dawî bibe û gelê Kurd bigihîje mafên xwe yên netewî û demokratîk, em ê hîn zêdetir refên xwe bijidînin. Di vî warî de berpirsyariya herî mezin dikeve ser milê me.

Me biryar daye ku ji bo azadiya gelê Kurd û Kurdistanê li ser zemîna netewî yekîtiya xwe ava bikin. Em ê xewlên xwe yên jibo yekîtiya neteweyî roj bi roj xurtir bikin.

Newroz bihar e, destpêkek nû ye, îradeya ji nû ve avakirinê ye.

Werin em di vê Newrozê de li dora nasnameya xwe ya netewî, zimanê xwe yê xweşik û nirxên xwe yên netewî û dîrokî mil bidin milê hev.

Ji bo nasname û hebûna me ya netewî ya Kurd bibe xwedî statuyeke destûrî, ji bo zimanê Kurdî bibe zimanê fermî û perwerdehiyê û astengiyên li pêşiya azadîya xwerêxistinkirinê bên rakirin, werin em seferber bibin.

Werin em bi hişmendiya dîrokî û berpirsiyariya neteweyî ji nû ve destpê bikin.

Ruhê Newrozê ferman dike ku em ji nû ve destpê bikin. Hafizeya Newrozê destnîşan dike ku li dijî zilm û neheqiyê berxwedan xurtir bibe. Felsefeya Newrozê ji me re dibêje ku em hêviyê û têkoşînê hîn bilindtir bikin.

Îro Newroz e.

Ji bo ku ji nû ve dest pê bikin, hêvî û berxwedana azadî û serxwebûnê hîn bilindtir bikin, stranên serketinê hîn xurtir bisitirînin; tam wexta wê ye

Werin em îsal agirê Newrozê hê zêdetir geş bikin.

Em dikarin Newroza 2025an bikin destpêka azadiyê.

Newroz li gelê Kurd û gelê Kurdistanê pîroz be.

20 Adar 2025

Partîya Maf û Azadîyan (HAKPAR)

Partîya Demokrat a Kurdistan Bakur (PDK Bakur)

Partîya Sosyalîst a Kurdistan (PSK)

Partîya Welatparêzên Kurdistan (PWK)